全台語 36 點鐘起鼓｜#14
🦄Siá/Tiongkokōe/SióNgá tī 2016 nî 3 goe̍h 21, Pài 1
🐕E̍k/Tâioânōe/Jūn tī 2022 nî Chiaⁿ goe̍h 30, Lépài
Iauchhiáⁿ lí chòhóe lâi “Choân Tâigí Liânsòa 36 tiámcheng”.
邀請汝做伙來「全台語連續 36 點鐘」。
Ùi chitmá khaisí kàu 4/13, m̄koán lí tī Tâioân tóūi, lí nā chúnpī hósè, tiō khaisí lí ê choân Tâigí 36 tiámcheng.
Khaisí liáuāu, hoangêng hunhiáng lí sī tī tē kúi tiámcheng, sīmchì sī huncheng, tiō phòkong? Bô hoattō͘ iōng Tâigí kóng ê sû sī siáⁿ? Kám sī inūi bēhiáu kóng? Sī ánchóaⁿ bēhiáu chit ê sû? Inūi tī ha̍khāu o̍h ·ê lóng Pakkiaⁿōe? Ēhiáu kóng, m̄koh m̄ iōng Tâigí ê goânin sī siáⁿ? Inūi kámkak lâng thiaⁿ bô? Lâng thiaⁿ ū, lí mā ēhiáu kóng, m̄koh lín 2 lâng m̄ iōng Tâigí ê goânin sī siáⁿ?
Ùi chitmá 開始到 4/13、不管汝 tī 台湾叨位、汝 nā 準備好世、tiō 開始汝 ê 全台語 36 點鐘。
開始了後、歡迎分享汝是第幾點鐘、甚至是分鐘、tiō 破功？無法度用台語講 ê 詞是 siáⁿ？咁是因爲袂曉講？是按盞袂曉 chit ê 詞？因爲 tī 學校學个 lóng 北京話？Ē曉講、不閣不講台語 ê 原因是 siáⁿ？因爲感覺人听無？人听有、汝 mā ē 曉講、不閣恁二人不用台語 ê 原因是 siáⁿ？
Ū 1 ê pêngiú kā góa mn̄g, sī ánchóaⁿ góa ē chiah hoânló Tâigí? I chiâⁿ ìgōa, kóng i ê khangkhòe tiûⁿ Tâigí iûgoân chiâⁿ kiôngsè ā, tāipō͘hūn lâng lóng kóng Tâigí ā. Sī ánchóaⁿ góa ē kóng Tâigí beh sí à?
Nā m̄ sī khòaⁿ góa ê bīnchheh, i 1 tiám á to bô kámkak Tâigí sī leh kiâⁿ hiòng síbông ê gígiân.
有一个朋友 kā 我問、是按盞我 ē chiah 煩惱台語？伊誠意外、講伊 ê 空課場台語猶原誠強勢 ā、大部份人 lóng 講台語 ā。是 ánchóaⁿ 我 ē 講台語 beh 死 à？
Nā 不是看我 ê 面冊、伊一點仔都無感覺台語是 leh 行向死亡 ê 語言。
Kám ū iáⁿ ánne?
Tâioân kok só͘chāi koh ē kóng Tâigí, koh goānì kóng Tâigí ê lâng,
kám ētàng chhiáⁿ lín lâi chhì khòaⁿmāi choân Tâigí 36 tiámcheng?
咁有影 ánne？
台湾各所在閣 ē 講台語、閣愿意講台語 ê 人、
咁 ē凍請恁來試看覓全台語 36 點鐘？
M̄koán lí siáⁿmih sîkan kóng 1 kù Pakkiaⁿōe chhut ·lâi, lóng hôepò hō͘ ·gún, hō͘ gún chaiiáⁿ sī ánchóaⁿ lí bô hoattō͘ kanna iōng Tâigí leh?
Tongjiân, nā chinchiàⁿ 36 tiámcheng keng móa, ū aBêng*2 chhiammiâ siòngphìⁿ sàng hō͘ ·lí~
不管汝 siáⁿmih 時間講一句北京話出來、lóng 回報 hō͘ 阮、hō͘ 阮知影是按盞汝無法度 kanna 用台語 leh？
當然、nā 眞正 36 點鐘 keng 滿、有阿明*2 簽名相片送 hō͘ 汝～
Chòhóe lâi Tâigí malásóng~ Choân Tâigí 36 tiámcheng khíkó͘!
Ū chhamka ê lâng kín lâi siá simtek!
做伙來台語 malásóng～全台語 36 點鐘起鼓！
有參加 ê 人緊來寫心得！
Tionggí goânbûn / 中語原文：
